Увс аймгийн Улсын бүртгэл, Статистикийн газраас энэ сарын 4-нд Аймгийн сонгуулийн хороонд 49 мянга 162 сонгогч Увсад байна гэсэн мэдээг гаргаж өгчээ. Гэхдээ сонгогчдын шилжилт хөдөлгөөн дуусаагүй байгаа тул энэ тоо баттай биш, энэ сарын 25-нд Увс аймгийн сонгогчдын тоо эцэслэн гарах юм байна.
Сонгогчдын шилжилт хөдөлгөөн энэ сарын 15 хүртэл үргэлжилсэн бөгөөд харин бүртгэл нь 19-нд дуусах аж. Сонгогчдын нэрсийн жагсаалтад иргэн өөрийнхөө нэрийг байгаа эсэхийг шалгах боломжтой ба хэрвээ ямар нэгэн зөрчил байвал яаралтай арилгуулах шаардлагатай байна.
Энэ сонгуулиар Улаангом сумын хэмжээнд 12 Санал авах байр ажиллах юм байна. Улаангом сумын 1-р багийн сонгогчид “Чандмань-Эрдэм” ахлах сургуулийн хичээлийн байранд, 2-р багийн сонгогчид шар цэцэрлэгт, 3-р багийн сонгогчид Бөхийн өргөөнд, 4-р багийн сонгогчид Ахлах 4-р сургуулийн хичээлийн байранд, 5-р багийн сонгогчид Цогцолбор 2-р сургуулийн спорт зааланд очиж саналаа өгөх нь ээ. Харин 6-р багийн сонгогчид Ахлах 3-р сургуулийн хичээлийн байранд, 7-р багийн сонгогчид Цогцолбор 1-р сургуулийн хичээлийн байранд, 8-р багийн сонгогчид Чандманий Соёлын төвд, 9-р багийн сонгогчид “Увс-Эрдэм” ахлах сургуулийн хичээлийн байранд, 10-р багийн сонгогчид Багийн төвд, 11-р багийн сонгогчид хуучин спорт хороонд, 12-р багийн сонгогчид Улаангом коллежийн хичээлийн байранд тус тус очиж саналаа өгөх юм байна.
Увс аймаг Б.Батхүү
